Единицата за брзи артивистички акции постави повеќе корпи за отпадоци низ Скопје со натпис „Собирен пункт“ и текст во кој се објаснува дека „корпите се поставени со цел да им помогнат на Шведска“.
„Поттикнати од последните анализи и истражувања дека во поголем дел од Шведска воопшто нема ѓубре и затоа го увезува од странство за да ги продолжи процесите на рециклирање со кои произведува огромни количества електрична енергија и гориво, Единицата за брзи артивистички акции на повеќе локации во главниот град постави канти за ѓубре или таканаречени солидарни пунктови со цел да и’ помогне на оваа скандинавска земја“, велат од Артивисти.мк.
Тие додаваат и дека со акцијата сакаат да ги мотивираат граѓаните да бидат солидарни со скандинавската држава и воедно сите да размислат за повеќедецениската традиција на фрлање и трупање ѓубре насекаде.
„За потсетување, уште од почетокот на 90-тите години, Шведска применува сеопфатен систем за селектирање и рециклирање на отпадот. Низ ревидирање на законската рамка и во тесна соработка со стопанството и граѓаните, Шведска направи еколошки свесно општество. Затоа пак, кај нас мака мачиме со собирање на ѓубрето, појавувањето на бројни диви депонии, ѓубре низ природата и насекаде каде што поминало неговото височество – Човекот“, додаваат артивистите.
Во посериозен тон, организаторите на акцијата порачуваат до локалната и централната власт воведување ефективен систем за рециклирање, оптимален број на канти за ѓубре за селекција на отпадот и редовно празнење и одржување, додека до граѓаните апелираат на поголема свесност и фрлање на ѓубрето на местата предвидени за тоа.