Од 5 -ти до 12-ти август ќе се одржи 21 издание на еден од најпознатите фестивали во источна Европа, „Сигет“ (Sziget) во Будимпешта, Унгарија. Од изведувачите кои досега се потврдени, се издвојуваат Blur, Skunk Anansie, Die Ärzte, Azealia Banks, Editors, Sebastian Ingrosso, Bad Religion, Empire of the Sun, Dizzee Rascal, Peter Bjorn & John, Netsky, Chase & Status и многу други.
Будимпешта, главниот град на Унгарија, спаѓа во оние градови кои никогаш не спијат. Убавиот помин го гарантираат бројните ноќни клубови, чилаут барови, концерти, случувања на отворено и секако не смее да се пропушти и барем едно капење во некоја од бројните термални бањи кои се составен дел од доживувањето на градот. Движењето низ градот е многу едноставно, дали ќе се одлучите пешки, дали со помош на јавниот превоз (метро, трамвај, автобуси, тролејбуси и др.) сè ви е на дланка.
Во 2011 година „Сигет“ беше прогласен за најдобар европски голем фестивал на European Festival Awards, а самите музички ѕвезди го рангираа во омилените пет фестивали. Фестивалот нуди 7-дневно летување на островот Обудаи во срцето на Будимпешта со над 200 настапи дневно на над 60 различни сцени. Во изминатите 10 години фестивалот брои годишна посетеност од 400.000 посетители од над 70 земји, а и минатата година за прв пат беше изведен директен пренос на Youtube.com каналот на Sziget кој го следеа рекордни 5.000.000 гледачи. Еве дел од атмосферата како беше минатата година….
Овој настан започна во 1993, во организација на музичарот Péter Müller и менаџерот Károly Gerendai , кои ја почувствуваа потребата за голем музички фестивал. Тие му се обратија на градот Будимпешта за поддршка и добија позитивен одговор и како локација го одбраа островот Обудаи на реката Дунав кој и ден денес претставува совршена локација. Во пролетта 1993 година беше основана Sziget Ltd. и оттогаш наваму сè е историја.
За повеќе информации можете да пристапите на нивната официјална веб страна Sziget Festival, на нивната фан страна на Facebook, Sziget Festival Official, како и на Твитер @szigetofficial.
Николај Митрески