Royal Stockholm Seaport во Стокхолм претставува еден од најсовремените примери за паметен и одржлив урбан развој во Европа. Овој проект ја трансформираше поранешната индустриска зона во модерен, еколошки одговорен и технолошки напреден градски кварт, кој денес служи како модел за идните зелени градови.
Развојот е заснован на принципот „град за луѓето“, а не за автомобилите. Приоритет имаат пешачките и велосипедските патеки, како и ефикасниот јавен превоз. Улиците се осмислени како мултифункционални зелени коридори, прилагодени на сè поинтензивните врнежи и повисоките температури предизвикани од климатските промени.
Централно место имаат зелената и сината инфраструктура. Дождовницата се третира како ресурс, преку интегриран систем за управување со атмосферските води, паркови, дождовни градини и зелени покриви. Посебно внимание е посветено на поврзаноста со Nationalstadsparken, со цел зачувување на природните коридори за движење на животните и инсектите. Во рамки на проектот е изграден и тунел за жаби како симбол на грижата за биодиверзитетот.
Во новоизградениот дел денес живеат околу 7.000 жители. Сите нови објекти се проектирани како згради со речиси нулта потрошувачка на енергија, со задолжително производство на соларна енергија. Постојните објекти мора да ја подобрат енергетската ефикасност за околу 50 проценти.
Управувањето со отпад е организирано преку подземен вакуумски систем што ги поврзува зградите со централен терминал за селекција. Двапати годишно се организира мобилен центар за повторна употреба на кабаст отпад.
Со комбинација на современи технологии, строги еколошки стандарди и зачувување на културното наследство, Стокхолм создаде пример за град на иднината – простор што одговара на климатските предизвици и поставува нови стандарди за одржлива урбана градба во Европа.
Извор: EUpravozato
Фото извор: Freepik
