„Епл“ успешно го заврши купувањето на „Шазам“, популарната апликација за препознавање на песни. Компанијата потврди дека ја купила апликацијата и нејзиниот тим за 400 милиони долари во декември минатата година.
Купувањето беше привремено задржано поради истрагата од страна на Европската унија, која го разгледа договорот околу потенцијални услови за создавање монопол. Но, регулаторите информираа дека нема ништо спорно минатиот месец.
Она што сигурно ќе биде добра вест за корисниците на „Шазам“, е тоа што „Епл“ објави дека ќе ги отстрани сите реклами од апликацијата „наскоро”.
„Шазам“ е симната повеќе од милијарда пати во светот и се користи повеќе од 20 милиони пати секој ден, според соопштението на „Епл“. Апликацијата постои од почетоците на „Еп стор“ и беше една од раните примери за тоа што може да направи една мобилна апликација.
„Шазам“ функционира на тој начин што го држите вашиот телефон додека слуша некоја песна која свири во близина неколку секунди, по што информациите за песната и изведувачот се појавуваат на екранот. Таа моментално е достапна на повеќе платформи.