На второто издание на фестивалот „ПРО-ЗА Балкан“, кој ќе се одржува од 27-ми до 29 мај, годинава се воведува Скопје стипендиска програма. Организаторот на фестивалот, издавачката куќа „Икона“, соопшти дека ќе гостуваат издавачи, литературни агенти и скаути и директори и програмски менаџери на фестивали од Европа.
– Програмата е замислена како платформа која би помогнала да се засили промоцијата на писателите од Македонија. Целта на програмата е важните имиња од познатите фестивали и од светот на издаваштвото да ги запознаеме со македонската книжевна сцена, од што, се надеваме, ќе произлезат нови преводи, гостување на писатели од Македонија во странство, промоција на литературата од Македонија, вмрежување на писателите и културните работници од сферата на издаваштвото и книжевноста со колегите од Европа и, во догледно време, од светот, соопшти „Икона“.
Организаторот најави дека на првата Скопје стипендиска програма ќе гостува Ен Луис Фишер, која е меѓу најпознатите литературни скаути во светот и работи за големи издавачи како „Пингвиг Рандом“, „Лафон“, „Рандом хаус“, пренесе МИА. На листата на „Гардијан“ таа е една од 50 најмоќни луѓе во светот на книгата во Велика Британија. Ен Луис Фишер работи и како скаут за филмската компанија „Хејдај“ која ги снимаше сите продолженија на „Хари Потер“, како и оскаровецот „Гравитација“. Таа во Македонија ќе дојде по препорака од Интернационалниот литературен фестивал „Танпинар“ од Турција, фестивал-партнер на ПРО-ЗА Балкан.
Останатите членови на Скопје стипендиската програма ќе бидат соопштени за десетина дена. Планирано е гостите да се сретнат со повеќе издавачи од Македонија кои ќе им ги претстават нивните писатели, со што ќе добијат сознанија за македонската литература. Контактите ќе овозможат и повеќе преводи на македонски изданија во странство.