По повод денешниот Светски ден на бегалците, Агенцијата на Обединетите нации за бегалци (УНХЦР) во Македонија, заедно со Македонското здружение на млади правници и Здружението на новинарите на Македонија ја додели Наградата за професионално известување за бегалците, барателите на азил и лицата без државјанство на годинешните победници Фиљана Кока (МРТВ), Емилија Петреска (Дојче Веле на македонски) и Мики Трајковски (Глас на Америка).
„До новинарите: преку вашата работа, вие им давате глас на оние што не се слушнати, ја осветлувате неправдата и градите мостови на емпатија. Квалитетното новинарство е повеќе од професија – тоа е јавна служба. Ја славиме и најновата класа студенти кои ја завршија програмата на Центарот за бегалско право и миграции. Овие млади правни умови – нашите идни адвокати, судии, застапници – избраа да се вклучат, да учат и да застанат во одбрана на оние што најчесто се оставени на маргините. Вашата посветеност дава надеж дека следната генерација ќе ги носи вредностите на заштита, вклученост и правда“, рече Габриел Гулијано де Годој, претставникот на УНХЦР во Македонија.
Фото: УНХЦР
УНХЦР им оддаде признание за храброста и издржливоста на бегалците насекаде во светот и им порачува да ја одржуваат надежта жива. Денеска, тие ги слават и студентите кои ја завршија програмата на Центарот за бегалско право и миграции при Правниот факултет Јустинијан Први во Скопје изминатава академска година. Од Агенцијата упатија благодарност и до сите кои работат солидарно за бегалците и подобрување на нивниот живот во македонското друштво.
Наградата се доделува 11 години по ред.
