Американското остварување, епската приказна за растењето, снимана цели 12 години, „Boyhood“ е прогласено за најдобар филм за изминатата година на 68-то доделување награди на Британската филмска академија (БАФТА) во Лондон. Режисерот на филмот, Richard Linklater, го понесе одличјето за најдобра режија.
Eddie Redmayne ја доби наградата за најдобра главна машка улогa, за остварувањето во филмот „The Theory of Everything“, каде го игра физичарот Stephen Hawking. За најдобра актерка е прогласена Julianne Moore, за улогата во филмот „Still Alice“, каде глуми жена која боледува од Алцхајмерова болест, пренесуваат агенциите.
Во одвоената категорија за најдобар британски филм, победи филмот „The Theory of Everything“. Наградите за споредна женска и машка улога ги однесоа Patricia Arquette за филмот „Boyhood“ и J.K. Simmons за „Whiplash“, додека за најдобар филм вон англиското говорно подручје е прогласено полското остварување „Ida“.