Вкупно 43 средни стручни училишта со 110 предлог-проекти аплицираа на јавниот повик што го објави Министерството за образование и наука. Грант програмата е вредна 700.000 евра, а се спроведува со поддршка на Светска банка.
Средствата се неповратни и се даваат за финансирање проекти на средните стручни училишта, изработени во партнерство со некоја компанија, со крајна цел – зајакнување на нивната меѓусебна соработка и унапредување на практичната настава и вештините за вработување на учениците.
Согласно критериумите на програмата, соопшти заменик-министерот за образование и наука Спиро Ристовски, одлучено е да бидат прифатени 54 предлог проекти, чие финансирање ќе се реализира етапно почнувајќи од првите 10 најдобро рангирани проекти.
Тој потсети дека повикот беше објавен во април годинава, за неколку типови грантови во висина од 5.000 до 20.000 евра. Парите се наменети за проекти како реализација на практична настава, организирање кампови за техничка обука за време на летен распуст, курсеви за практична обука во училиштата и слично.