Од 26 до 30 август во Пула (Хрватска) ќе се одржи уште едно издание од фестивалот Dimensions. Иако публиката е веќе навикната на разновидност на програмата, оваа година таа е зачинета со уште повеќе вкусови од очекуваното. Можеби највкусниот зачин е настапот на гигантите George Clinton, Parliament и Funkadelic. За оние кои не се запознаени со овој колектив, доволно за нив кажува фактот дека го револуционизираа жанрот познат како R&B, а нивните песни се семплувани од мноштво артисти, меѓу кои и Snoop Dog, Dr.Dre, Daft Punk итн. Нивниот опус опфаќа се – од психоделичен рок до диско фанк. Квалитетот и значењето на овој бенд тешко се опишува, но затоа подолу може да го преслушате еден од нивните најсочни албуми.
Концертот за отворање на фестивалот (на кој што минатата година настапи пијано „ѕверот“ Nils Frahm) оваа година ќе биде просветлен од страна на меките звуци на Little Dragon, Џез – Техно – Фанк настапот во живо на невронаучникот Floating Point и експерименталните звуци на Four Tet.
За фановите на квалитетната музика за танцување оваа година ќе можеме да се слушнат Bodikka, Loefah, John Talabot, Horse Meat Disco, Dorian Concept, Moxie и многу други. Dimensions веќе стана познат по тоа што избира артисти кои се пионери во различни жанрови, и знаат да експериментираат надвор од нив.
Друг важен додаток на Dimensions 2015 е легендата Juan Atkins кој оваа година слави 35 години техно кариера. Неговото детроитско влијание врз овој музички жанр може да се спореди со тој на Funkadelic врз RnB-то. Кариерата на Atkins се состои токму од сечење на нивни (или слични) семплови и процесирање на истите низ звуците и дисторзиите на Kraftwerk и B-52.
За да биде прошетката низ музичките жанрови целосна, на овогодинешното издание Dimensions одлучиле да ги додадат и искршените звуци на џунглата. Во овој жанр се вклучени Metalheadz пионерите Goldie и Doc Scott, oldschool легендата DJ Randall, тешките играчи на длабоките басови DLR, Ulterior Motive, Jubei и многу други.
5 денови по завршувањето на Dimensions започнува бас екстраваганцата Outlook. Уште на концертот за отворање на фестивалот се најавуваат звучни имиња кои прават квалитетна музика. Публиката ќе ја има честа да ги чуе SBTRKT, Jurassic 5, Roni Size Reprezent (Live), Gentleman’s Dub Club и Trojan Sound System.
Секоја година Outlook ечи од весели реге звуци, а ова издание не е исклучок од правилото. Меѓу попознатите имиња кои ќе настапуваат се Bennie Man, Cutty Ranks, Iration Steppas, Dub Smugglers, David Rodigan и многу други.
Највкусното на Outlook секогаш се Drum and Bass настапите. Еден од најбитните настапи оваа година ќе биде настапот на легендарната четворка Bad Company (Jason Maldini, dBridge, Fresh и Vegas). Љубителите на реге инспирираниот dnb ќе можат да ги чујат и основоположниците на џанглот Shy Fx, Congo Natty и Kenny Ken. За тие што ги сакаат своите басови потврди тука се Noisia, Upbeats, DJ Hype, Dub Phizix, Mefjus, Enei, Skeptical итн.
Додатно Outlook е зачинет со широк избор на бас звуци меѓу кои се наоѓаат Digital Mystikz (Mala & Coki), Run the Jewels, Dj Ez, Icicle – Entropy Live, Kode9, Zed Bias, Toddla T и многу други. Како што би кажале британците – Be there or be square.
За оние кои сакаат да уживаат во овогодинешното искуство во Пула, тоа за граѓаните на земјите од бивша Југославија моментално чини околу 86 евра по фестивал, а кампувањето 73 евра. Патешествието до Пула може да се организира на неколку начини- автобус чини околу 115 eвра и трае околу 18 часа. Ако се купи порано билет, летот од Скопје до Пула ја има најниската цена од 195 eвра и трае околу 7 часа, со трансфери.
Fat Beats