Четириесет учесници и триесетина предавачи од Македонија и светот ќе бидат дел од деветтата Школа за млади лидери која ќе се одржува во Струга од 20 до 30 август. На свеченото отворање на Школата в понеделник во Струга, покрај претседателот Иванов, обраќање ќе има и поранешниот претседател на Летонија Валдис Затлерс.
Оваа година програмата на Школата за млади лидери ќе биде фокусирана на најдобрите практики и знаења за развој на еко-системи за поттикнување на стартап, мали и средни претпријатија, како и деловното истражување и иновациите.
Меѓу предавачите годинава ќе бидат Дејвид Голдсмит, еден од водечките експерти за бизнисменаџмент и лидерство, Озгур Торт, главен извршен директор на „Мигрос груп“, Штефан Петер, претседател на Извршниот одбор на „ЕВН Македонија“, Пинар Ајваз Арикан, генерален директор на „Туркиш ерлајнс“ во Скопје, Есер Џевахир, директор на „Џевахир холдинг“, Сани Шенер, извршен директор на „ТАВ аеродроми“, Бајбарс Алтунташ, претседател на Инвестициониот форум за светски бизнис-ангели, Дејвид Бекет, TEDx тренер, Снежана Живчевска-Сталперс, менаџер на проекти во ИБМ.
Вкупно, во досегашните осум обуки во рамки на Школат учествувале околу 320 млади луѓе од целата земја и од странство, со различен академски и професионален фокус, а со желба да ги развиваат своите лидерски вештини и капацитети и да придонесат за идниот позитивен развој на општеството и околината во која живеат и работат. Пред осумте генерации учесници на Школата за млади лидери свои предавања одржаа над 180 реномирани предавачи од Република Македонија, Европа и светот.
Реализацијата на школата е во целост поддржана од приватниот сектор преку донации.