Во организација на невладината организација „Хрватско-македонска тангента“, од 10 до 12 септември ќе се одржат Денови на македонска култура во Шибеник. Отворањето е закажано за вечерва во Градската библиотека „Јурај Шижгориќ“, каде ќе се одржуваат изложба, предавање, книжевни разговори, читање поезија и проза, но и слични уметнички содржини.
Манифестацијата е под покровителство на шибенскиот градоначалник Жељко Буриќ, а според организаторите ова е посебен формат, бидејќи во истиот термин, како и минатата година, ќе се одржи и настанот познат како Зларински средби на писатели, поети, публицисти и новинари.
Настанот е тематски збогатен со нови содржини, па првиот ден е планирана изложба „Чувари на македонската традиција“ со етно експонати од приватната колекција на семејството Георгиевски, како и слики на Оливера Вапска, изработени во посебна филигранска техника со срмен конец.
Со посебно внимание се очекува предавањето на познатиот метеоролог, Момчило Живковиќ, од Белград, на мошне актуелна тема „Климатски промени, грижа за планетата Земја“, во која ќе бидат емпириски опфатени и параметри кои се однесуваат на регионот, вклучувајќи ги Хрватска и Македонија.
Во димензијата што се однесува на размена на книжевни творби и искуства ќе бидат читани автентични делови од поетски и прозни книги на присутните автори од Загреб, Шибеник, Задар, Пула…
Како што наведуваат организаторите, вториот ден од настанот ќе се вклучи познатиот хрватски вајар, Александар Губерина, кој за поврзаноста на македонскиот и хрватскиот народ има изработено специјална скулптура. Учесниците на Деновите на македонска култура ќе имаат можност да го разгледаат новиот ателје на Губерина и да се запознаат со деталите на неговото творештво, богатство на уметнички техники и фази во неговиот уметнички опус.