Населението во Тајланд вчера излезе на антивладин протест со кој побара измени во монархијата и ограничување на нејзините овластувања.
Демонстрантите беа облечени како Хари Потер и други ликови од популарната франшиза, упатувајќи критики кон владата поддржана од воените сили.
Анон Нампа, 34-годишен адвокат, ја обвини палатата за преземање на поголеми овластувања што според него ја поткопале демократијата. Откако Маха Вахиралонкорн го презеде престолот во 2016 година, палатата бараше ревидирање на новиот устав кој му даде поголеми овластувања во итни случаи. Кралот оттогаш презеде лична контрола врз некои единици на армијата и имотот на палатата во вредност од десетици милијарди долари.
Во меѓувреме, некои активисти се пожалија на малтретирање од страна на властите, велејќи дека најмалку девет опозициски фигури кои живеат во странство исчезнале. Двајца подоцна беа пронајдени мртви.
„Да се зборува за ова не е чин за да се собори монархијата, туку да се дозволи монархијата да постои во тајландското општество на вистински начин и легитимно под демократска и уставна монархија“, рече Анон пред насобраните демонстранти.
Нивните барања вклучуваат повлекување и реформирање на законите со кои се проширува моќта на монархот и кои може да влијаат врз демократијата. Покрај ова, студенти бараат и властите да ги изменат законите со кои се забранува критика на монархијата.
Студентски протести за барање оставка од владата и создавање нов устав се случуваат скоро секој ден.
Критиката беше премногу ретка за време на претходниот крал, Бумибол Адулјадеј, чие 70-годишно владеење заврши со неговата смрт во 2016 година.