Сместен во зелената идила на мегаломанскиот парк „AmsterdamseBos“, на само 20 минути од Амстердам, годинава се одржува третото издание на фестивалот на електронска музика „Dekmantel“ .
Иако релативно нов, „Dekmantel“ веќе станува препознатлив фестивал кој не ја остава публиката рамнодушна со секоја негова едиција. Годинава освен четирите отворени сцени, каде се одржува дневната програма, фестивалот е збогатен со две нови локации за ноќните настани.
Станува збор за инспиративната концертна сала „Muziekgebouw“ каде ќе се одржува отварањето на фестивалот, како и познатиот амстердамски ноќен клуб „Melkweg“, во кој директно по дневното и сончево журкање, љубителите на електронската музика ќе имаат можност да ја продолжат својата забава.
Иако „Dekmantel“ еден од помалите и поинтимни фестивали, тој нуди неповторливо доживување со добро одбраните диџеј сетови и „лајв“ перформанси на некои од најголемите и најквалитетни водечки артисти во електронската музика.
Почетокот на фестивалот е најавен на 30 јули, а затворањето на 2 август. Во овој периот Амстердам ќе ечи од енергичните звуци на хаус, техно, електро, бас и диско музиката.
Отварањето на фестивалот ќе биде предводено од настапите во живо на Autechreи Manuel Göttsching – E2-E4, додека на остатокот од четиридневната програма се појавуваат имиња како: Actress ( live), Ben Klock, Ben UFO, Carl Craig ( live), Dixon, Four Tet, Jeff Mills, Joy Orbison, John Talabot, Helena Hauff, Madlib ( dj set), Marcel Dettmann, Model 500 ( live), Monolake ( live), Nina Kraviz, Paranoid London ( live) Recondite ( live), Ricardo Villalobos, Siriusmodeselektor ( live), Surgeon, Tale of Us, Tripeo.
Целата програма може да се преземе на официјалниот сајт на „Dekmantel 2015“.