Здружението за заштита на бездомните животни „Дејзи фемили“, предупредува дека откако стапи на сила полициски час на територијата на целата држава, забележан е зголемен број труења на бездомни животни и домашни кучиња по опасниот отров „ланате“, кој е расфрлан на повеќе јавни површини во повеќе реони низ Скопје и околината.
Појаснуваат дека во неделата е отруено едно бездомно куче под нивна грижа, друго куче починало пред неколку часа, а имаат информации за расфрлан отров во текот на изминатиот викенд во Карпош, Радишани, Ново Лисиче, Козле, Влае.
„Сакаме да потенцираме дека несомнено е дека се работи за извршување на смислени и планирани дејствија, особено ако се земе предвид фактот што во најголем дел се работи за маалски миленици, односно животни под грижа на здруженија, независни активисти и локални жители, кои во својот реон живееле подолго време и со кои не е поврзан ниту регистриран било каков инцидент, односно немил настан како напад и угризување на минувачи. Алармантно и симптоматично е тоа што овие кривични дела се извршуваат со
зголемен интензитет во вонредна состојба и при прогласен полициски час на територијата на целата држава, кога се претпоставува и очекува зголемено присуство на чуварите на јавниот ред и мир, а со тоа и зголемена безбедност на граѓаните“, велат од здружението.
Отровот „ланате“ е исклучително опасен како за животните, така и за луѓето и животната средина. Неговото расфрлање на јавни површини не е новина, а досега немаме сознанија за пронајден и соодветно санкциониран трујач, велат од здружението.
Затоа бараат од сите надлежни институции и органи на прогонот, а особено од АХВ, МВР и ЈО, итно да постапат по најновите пријави, ревносно да ги истражат труењата и да им посветат зголемено внимание особено со оглед на ситуацијата затоа што се работи за насилни криминалци кои се опасни по луѓето и околината. Бараме и одговор на прашањето, како и покрај сите сознанија и сите инциденти низ годините, продажбата на ваков опасен отров тече непречено и слободно на пазарот.