Рап легендите и перјаници на олд-скул хип хопот De La Soul објавија дека идниот месец почнуваат со снимање на нивниот осми студиски албум, прв по 11 години, „And the Anonymous Nobody“, кој планираат да го финансираат со кампања на сервисот Kickstarter, со која веќе се собрани над 150.000 долари.
На албумот се најавуваат гостувања на неколку познати групи и музичари, меѓу кои и David Byrne, 2 Chainz и Little Dragon, кои ќе се појават во песните “Snoopies,” “Whodini” and “Drawn“. Во следните месеци ќе бидат објавени имињата и на други артисти кои ќе гостуваат на новото издание.
Албумот ќе биде целосно изработен од семплови земени од бројните „џем сешн“ свирки на De La Soul со бендот од Лос Анџелес, The Rhythm Roots All-Stars.
„„And the Anonymous Nobody“ е заснован на две идеи: без ега, без хиерархија, без шефови, само група на еднакви кои работат врз една цел – правење музика. Второ, секогаш има некој „тивок“, храбар индивидуалец, некој „никој“ што се истакнува и „го спасува денот“. Тој застапува нешто поголемо од самиот себеси и ја прави промената. Ние сме тие „никои“, се истакнуваме, застапуваме нешто важно и се надеваме на промена“, велат од групата.
De La Soul исто така соопштија дека за донаторите на кампањата за новиот албум ќе следуваат низа подароци: ексклузивни траки, потпишани, рачно напишани текстови од песните и оригинална златна плоча од првиот албум на бендот, „3 Feet High And Rising“. Тројца од фановите дури ќе добијат и шанса да одат на шопинг со членови на De La Soul, со изборот да одат да купуваат патики со Mercer, играчки со David “Dave” Jude Jolicoeur или плочи со DJ Vincent “Maseo” Mason.
„And the Anonymous Nobody“ ќе биде првото ЛП-издание на De La Soul како трио од албумот „The Grind Date“ во 2004, а ова ќе биде сосема различен албум од изданието „You’re Welcome“, кое е се уште во изработка. Минатата година, недовршениот албум беше достапен за бесплатно преземање 25 часа, како гест со кој групата одбележа 25 години од издавањето на „3 Feet High and Rising“.