Црвен крст на РМ во соработка со Високиот комесаријат на бегалци при Обединетите Нации (UNHCR) во рамките на програмата за поддршка на мигрантите кои транзитираат во Р. Македонија реализира активности кои се насочени кон намалување на ранливоста и ублажувања на страдањата на овие лица.
Во Прифатниот центар за странци на МВР, Црвениот крст управува со здравствена единица каде се дава примарна здравствена заштита, лекови и транспорт до секундарно и терцијарно ниво на повеќе од 600 лица месечно. Овде лицата покрај здравствената заштита од Црвениот крст добиваат и храна, хигиена, облека и други непрехрамбени производи.
Со цел да се помогне и на лицата кои секојдневно масовно мигрираат на територијата на Р. Македонија формирани се два мобилни тима составени од лекар, медицинска сестра и возач кои укажуваат прва помош на повредени и изнемоштени лица и делат вода и храна. На дневна основа се укажува помош на 100тина лица идентификувани на територијата на градовите Скопје, Велес, Неготино и Демир Капија.
Заинтересираните правни субјекти и граѓани можат да се вклучат со обезбедување на парична помош:
– Сметка на Фонд на солидарност 300000001327966 ДБ 4030984271620 – Комерцијална банка
– Донирање на 100 денари со повик на телефоните: 075/070/077 143 400
Црвениот крст на РМ следејќи ги случувањата на терен, донираните парични средства ќе ги насочи наменски за помош на мигрантите.
„Апелираме до правните субјекти и граѓани донациите во материјална помош може да се обезбедат во вода за пиење, безалкохолни пијалоци, двопек, бисквити и конзервирана храна (пилешки нарезок и паштета, риба).
Помошта може да се предаде во магацините на Црвениот крст во Момин Поток од 08,00 до 16,00 часот (контакт тел: 3 096 227), до 30 јуни 2015 година.
За обезбедената и дистрибуирана хуманитарна помош јавноста ќе биде навремено и соодветно информирана“, стои во апелот на Црвен крст.
Мигрантите кои транзитираат низ Македонија доаѓаат од држави како Сирија, Пакистан, Сомалија, Авганистан. Тие со бродови стигнуваат до Грција, а оттаму низ Македонија и Србија се обидуваат да стигнат со Западна Европа. Македонија е една од црните точки на нивниот пат каде поради актуелните законите тие имаат илегален статус, најчесто се движат пеш по пругите и се кријат од полицијата.
Само во последниве две години, од воз беа прегазени триесетина мигранти.