Викендов во Белград се одржа студентскиот дебатен турнир „PEP IV“ на кој македонската делегација од Младински образовен форум стигна до четвртина и до полуфинале, а една од дебатерките го освои четвртото говорничко место на турнирот.
Вкупно 36 дебатни тимови составени од по двајца студенти дебатираа релевантни тези од областите на економијата и интернационалната политика, како и за насоките во кои функционира и треба да се менува општеството . Тие се натпреваруваа во форматот на Британска парламентарна дебата и имаа по 15 минути да ги подготват своите случаи.
Турнирот содржеше 4 прелиминарни рунди, четвртина финале, полуфинале и финале, а како претставници од Македонија учествуваа : Теодора Столевска и Мартин Божиновски кои стигнаа до полуфиналето на овој турнир, Иван Мицковски и Соња Митиќ кои стигнаа до четвртина финале и Огнен Јакасановски и Ѓорѓи Димески кои исто така стигнаа до четвртина финалето .
Покрај пласманите во полуфинале и четвртина финале, Теодора Столевска го имаше највисокиот личен пласман според говорнички поени и заврши како четврти говорник од вкупно 72 дебатери.