Бугарскиот писател Алек Попов е добитник на наградата „Прозарт“

Бугарскиот писател Алек Попов е годинешниот добитник на наградата за авторски придонес кон развојот на книжевноста на Балканот – „Прозарт“.

Авторот на романите „Мисија Лондон“, „Црната кутија“, „Сестри Палавееви“ ќе биде гостин на 7. издание на Интернационалниот литературен фестивал „Про-За Балкан“, кој ќе се одржи од 19 до 22 мај. Признанието ќе му биде врачено на 21 мај во Даут-пашиниот амам во Скопје.

Попов се смета за еден од најисклучителните раскажувачи во современата литература на Балканот. Препознатлив е и по кусите раскажувачки форми. Неговите раскази од збирките „Мрсни сништа“ и „Ниво за напреднати“ се влезени во многу национални и меѓународни антологии на раскази. Попов е и драматург и есеист, а е косценарист и на македонската популарна ТВ-серија „Преспав“.

Попов е добитник на многу литературни награди, меѓу кои „Хеликон“ за најдобра прозна книга на годината во 2002 и во 2013 година, Чудмировата награда за сатирична фантастика, наградата „The Reading Man Prize“, националната награда „Иван Радоев“ за драма, награда за современ бугарски роман на Фондацијата „Елизабета Костова“ и „Питер Овен паблишерс“.