Во Кинотека на Македонија во Скопје, од 11-19 мај, ќе се одржи фестивалот на германски филмови за деца – БУФ. Проекциите ќе започнуваат во 20 часот, а ќе се прикажуваат „Тајната на рубинот“, „Тигар Тим – планината на 1000 змејови“, „Малиот дух“, „Ѕвездата на Лаура“, „За бувовите, авионите и ранобудниците“, како и култниот филм „Бескрајна приказна“ на режисерот Волфганг Петерсон.
Во продолжение, распоредот и краток опис на филмовите:
11 мај (понеделник) 12.00 ч.
14 мај (четврток) 20.00 ч.
ТАЈНАТА НА РУБИНОТ
(Rubinrot)
Игран филм, Германија
2013 г., 122 мин., колор, блуреј
Режија: Феликс Фухштајнер (Felix Fuchssteiner)
Сценарио: Катарина Шеде (Katharina Schöde)
Улоги: Џозефине Пројс (Josefine Preuß), Флоријан Бартоломеи (Florian Bartholomäi), Уве Кокиш (Uwe Kockisch)
На прв поглед, 16-годишната Гвендолин изгледа како и секое друго девојче на нејзина возраст. Но, во нејзиното семејство со генерации се пренесува еден ген кој на носителот му овозможува да патува низ времето. И Гидеон е носител на оваа исклучителна дарба, поради што двајцата се здружуваат да ја разоткријат семејната тајна, која е стара со векови.
12 мај (вторник) 12.00 ч
15 мај (петок) 20.00 ч.
ТИГАР-ТИМ – ПЛАНИНАТА НА 1000 ЗМЕЈОВИ
(Tiger-Team)
Игран филм, Германија
2010 г., 89 мин., колор, блуреј
Режија: Петер Гершина (Peter Gersina)
Сценарио: Томас Брезина (Thomas Brezina)
Улоги: Хелена Зигмунд-Шулце (Helena Siegmund-Schultze), Бруно Шуберт (Bruno Schubert), Јустус Камерер (Justus Kammerer)
Биги, Патрик и Лук се на распуст и случајно наоѓаат еден мистериозен клуч во форма на змеј. Сурфајќи на Интернет, Лук ја открива кинеската легенда за „Палатата на месечевиот сјај“ во Планината на 1000 Змејови и е убеден дека токму овој клуч ќе ја отвори нејзината порта. Со тоа е одлучено: тројцата, нарекувајќи се „Тигар-тим“, мора да отпатуваат за Кина, па што ќе биде, нека биде!
13 мај (среда) 12.00 ч.
16 мај (сабота) 20.00 ч.
МАЛИОТ ДУХ
(Das kleine Gespenst)
Игран филм, Германија
2013 г., 92 мин., колор, блуреј
Режија: Алан Гспонер (Alain Gsponer)
Сценарио: Отфрид Пројслер (Otfried Preußler)
Улоги: Јонас Холденридер (Jonas Holdenrieder), Емили Куше (Emily Kusche), Нико Хартунг (Nico Hartung)
Во замокот Ојленштајн уште од памтивека си се одомаќинил малиот ноќен дух. Дење живее повлечен во замокот и си спие во сандак на таванот, а ноќе се буди и лета по ходниците. Негова најголема желба е еднаш да го види светот дење. Но ниту тој, ниту неговиот единствен другар, бувот Шуху, не знаат како да го изведат тоа. Еден ден ученикот Карл ќе дојде со неговото одделение на ноќна прошетка низ замокот Ојленштајн и тогаш за првпат ќе се сретнат едно дете и еден дух. Оваа средба нема да остане без последици. Следниот ден, кога ќе се разбуди духот, не е полноќ, туку пладне!
14 мај (четврток) 12.00 ч.
17 мај (недела) 20.00 ч.
ЅВЕЗДАТА НА ЛАУРА
(Lauras Stern)
Анимиран филм, Германија
2004 г., 75 мин., колор, ДВД
Режија: Пиет Де Рикер (Piet De Rycker), Тило Роткрих (Thilo Rothkirch)
Сценарио: Клаус Баумгарт (Klaus Baumgart), Пиет Де Рикер (Piet De Rycker)
Улоги: Селин Вог (Céline Vogt), Сандро Ланота (Sandro Iannotta), Максимилијан Артајо (Maximilian Artajo)
Лаура и нејзиното семејство ќе се преселат од село во град. Една ноќ, по еден ѕвезден дожд, таа во паркот наоѓа повредена ѕвездичка и си ја зема дома. Веднаш се спријателува со неа и го негува нејзиниот повреден крак. Ѕвездичката ќе ги маѓепса играчките на Лаура и така ќе помогне таа да се навикне на големиот град. Но, набргу Лаура забележува дека ѕвездичката сака да се врати дома и дека го губи сјајот.
14 мај (четврток) 15.00 ч.
15 мај (петок) 15.00 ч.
ЗА БУВОВИТЕ, АВИОНИТЕ И ЗА РАНОБУДНИЦИТЕ
(Von Eulen, Flugzeugen und Frühaufstehern)
Документарен, Германија
2013 г., 24 мин., колор, ДВД
Режија: Ута Мајер (Uta Meyer)
Зошто толку многу сме воодушевени од бувовите? – се прашува водителката во филмот и за да го дознае тоа, оди да посети една соколарница. Оттаму, оди на аеродром, за да открие што можат авиоинженерите да научат од бувовите. Џојс Илг повторно се успива и сака да се испита во лабораторија за истражување на спиењето. Таму открива дека секој човек има внатрешен часовник и дека постојат два типа луѓе: чучулиги и бувови, т.е. ранобудници и спанковци.
15 мај (петок) 12.00 ч.
19 мај (вторник) 20.00 ч.
БЕСКРАЈНА ПРИКАЗНА
(Unendliche Geschichte)
Игран филм, Германија
1984 г., 102 мин., колод, ДВД
Режија: Волфганг Петерсен (Wolfgang Petersen)
Сценарио: Волфганг Петерсен (Wolfgang Petersen), Херман Вајгел (Herman Weigel)
Улоги: Ноа Хатавеј (Noah Hathaway), Барет Оливер (Barret Oliver), Тами Стронах (Tami Stronach)
Малиот Бастијан постојано го задеваат децата од неговото одделение. Еден ден бегајќи од нив, влетува во една антикварница и се запознава со еден стар трговец со книги, кој му покажува мистериозна книга. Бастијан ја „изнајмува“ книгата со чуден наслов: „Бескрајна приказна“, која ја чита на таванот од училиштето. Книгата раскажува за Атреј којшто сака да го спаси животот на „детската кралица“ Фантазија, а со тоа и да ја спаси од таинственото „Ништо“, коешто полека ја голта Фантазија и сите нејзини живи суштества.