Здружението за заштита на животните „Анима Мунди“ преку соопштение реагираше на фотографиите од брутално убиени кучиња, кои жители на Општина Аеродром ги споделија утрово.
„Ниту закони, ниту полиција која постапува и штити, ништо не функционира на дело, се е само празен збор на хартија – повторно фрапантен случај на насилство во Аеродром каде се убиени 2 мирни бездомни животни, миленици на жителите. Едното најдено мртво, другото испушти душа во најлоши маки на пат до ветеринарна станица каде го носеа и се обидуваа да го спасат Daisy Family Rescue. Тие и повикаа, пријавија во полиција“, стои во реакцијата на Анима Мунди.
„Сведоци сме на комплетно бесредие, нарушување на јавен ред мир, загозување на безбедноста на се што е живо. Ниту едно ветување за похуман третман на животните, ниту една процедура, закон или пропис, ништо, ништо, ништо не е унапредено! Активистите за правата на животните се излажани како никогаш до сега, со фрапантни случаи на насилство и институционално (масовно) убивање на бездомните животни се соочуваме буквално секој ден! На кривични пријави за мачење на животните не се постапува (Пехчево, Штип), а камо ли по претставки за Законот за заштита и благосостојба на животните. Системот е во колапс, не функционира ништо“, додаваат од здружението.
Од Анима Мунди најавуваат протести доколку итно не биде најден сторителот.