David Bowie продолжи да создава до самиот крај, објавувајќи го албумот Blackstar само два дена пред неговата смрт. Но, освен објавениот материјал, пејачот оставил уште неколку песни зад себе кои не се нашле на тоа издание.
Во интервју со продуцентот Tony Visconti за Los Angeles Times објавено на 8 јануари, репортерката Sasha Free-Jones пишува: „Има уште пет песни од сесиите на снимање кои не се објавени. Па, очекувајте го наредниот Божиќ и надевајте се на специјално издание“.
Bowie направи нешто слично со албумот The Next Day, објавувајќи подолги верзии од песните неколку месеци после првото издание и дополнувајќи го второто со песните Atomica и ремиксот на James Murphy на песната Love is Lost.
Во истото интервју, Visconti зборува за сесиите на кои се родил Blackstar. Според него, снимале во студио само неколку пати, бидејќи демо верзиите на Bowie биле одлични.