Министерството за труд и социјална политика (МТСП) заедно со Програмата за развој на Обединетите нации (УНДП) ја создадоа првата мобилна апликација за помош и поддршка на жртвите на насилство, насловена „Биди безбедна“ која од денеска е достапна за сите, информираа од МТПС.
Како што потенцираат тие, апликацијата ќе им помогне на жртвите на семејно насилство брзо и едноставно да побараат помош и поддршка, без разлика на времето и местото на кое се наоѓаат кога се во опасност или кога имаат потреба од поддршка. „Биди безбедна“ е достапна на три јазици, односно, на македонски, албански и ромски јазик.
„Со вклучување на геолокаторот само со еден клик жртвите го испраќаат својот мобилен телефонски број и точната локација на која што се наоѓаат до Националната СОС линија за жртви на семејно насилство. Веднаш потоа, жртвата ќе биде исконтактирана од одговорните лица. Апликацијата е најпотребна токму сега, во период на корона криза, кога постои ризик случаите на семејно насилство да се зголемат“, стои во соопштението на МТСП.
Оттаму посочуваат дека преку опцијата „Важни контакти“ која е достапна на апликацијата, ќе може да се исконтаткраиат сите институции и здруженија на граѓани кои даваат помош и поддршка на жртвите на сите видови на родово базирано насилство.
„Оваа апликација нуди многу можности, вклучувајќи ја и опцијата корисниците да си изберат броеви за поддршка од својот именик, член од семејството, личност од орган, институција, невладина организација или било која друга личност на која ѝ веруваат. Исто така апликацијата има едукативни и информативни содржини, вклучувајќи информации за правата на жртвите, практични совети за заштита, лични сведоштва на жртвите, како и целиот протокол за меѓусебна соработка на надлежните институции и здруженија за заштита и спречување од семејно насилство“, се додава во соопштението на МТСП.
Апликацијата може да се преземе за паметните телефони кои ги користат оперативните системи Андроид, Ејпл и Хуавеи.