Заменик министерот за внатрешни работи Оливер Андонов, изјави дека Специјалното јавно обвинителство прави политички циркус и би можело да предизвика безбедносни ризици, пренесува Телма.
Накратко после прес конференцијата на СЈО, пред МВР излегоа и Андонов, директорот на БЈБ Митко Чавков и директорот на УБК, Владимир Атанасовски, при што ја обвинија специјалната обвинителка и нејзиниот тим дека нивната нестручност, дрскост и неподготвеност при упадот во УБК, можела да доведе до упад во системот за следење на комуникациите во тековните активности.
„Јанева дошла и се сретнала со генералниот секретар на СДСМ Оливер Спасовски, сакале да влезат во УБК, а дури во 4 часот попладне е побарана и добиена судска наредба за претрес. При средбата Јанева беше дрска, а не ме ни извести дека е во МВР, иако сум дополнителен заменик министер, а ова се случува во предизборен период. Со своето нестручно постапување може да се предизвикаат безбедносни последици во тековни операции за следење на комуникации кои се важни за националната безбедност“, изјави Андонов.