Младата активистка Грета Тунберг соопшти дека целата сума од еден милион евра од наградата за хуманост која и ја додели португалската фондација „Гулбенкијан“, ќе ја донира на здруженија за заштита на животната средина, пренесува српски „Данас“.
„Тоа е повеќе пари од тоа што можам и да го замислам, но сите пари од таа награда преку мојата фондација ќе бидат распределени по разни организации и проекти кои им помагаат на луѓето во борба против климатската и еколошката криза, посебно на југот на планетата“, рече 17-годишната активистка во видео објавено на нејзиниот Твитер профил.
I’m extremely honoured to receive the Gulbenkian Prize for Humanity. We’re in a climate emergency, and my foundation will as quickly as possible donate all the prize money of 1 million Euros to support … ->
1/3 pic.twitter.com/Eti6AJXSvj— Greta Thunberg (@GretaThunberg) July 20, 2020
За почеток, 100.000 евра ќе бидат донирани на „СОС Амазонија“, бразилскиот огранок на „Петоци за иднината“. Иста сума ќе биде доделена и на фондацијата „Стоп Екоцид“, чија цел е да се пропише екоцидот како казниво дело во меѓународното судство, рече Тунберг.
Сумата од еден милион евра е најголемата што досега ја добила Тунберг. Таа е позната по движењето „Петоци за иднината“, односно младинските демонстрации за климата, уште од 2018 година.
Наградата „Гулбенкијан“ за хуманост, која се доделува секоја година, е најновата награда со најголема наградна сума на португалската фондација „Калуст Гулбенкијан“.
Целта е да се оддаде признание на поединци, групи или организации ширум светот, чии придонеси за ублажување и прилагодување на климатските промени се издвојуваат преку иновации и влијаение, се наведува во соопштението на фондацијата.