Откако ја исчистија депонијата во шумата кај Мирјанина Црква и притоа собраа над 400 кеси ѓубре, волонтерите и поддржувачите на иницијативата „За почиста Македонија“ сега на 1 ноември организираат нова еко-акција – овој пат во скопската општина Кисела Вода.
„Во Кисела Вода се крие едно од најголемите зеленила во Скопје кое за жал со години е запоставено од институциите и надлежните и преплавено со отпад. Но, не е заборавено од нас! Тука сме заедно со вас да во сабота (1 ноември) да покажеме како треба да изгледа местото. Без ѓубре, со насмеани и вредни луѓе!“, стои во повикот на „За почиста Македонија“.
Еко-акцијата ќе започне во 11 часот, а зборно место е на западната страна на Расадник, 100 метра зад „Get Caffe“, на паркингот по „Quatro Caffe“.
View this post on Instagram
„Опрема за чистење носиме ние. Малку ќе чистиме, малку ќе се дружиме а ќе поиграме и по некоја игра. Се гледаме таму! Не барајте човек за пример, бидете примерот!“, се вели во повикот за еко-акцијата.
Таа е поддржана од „ДМ Македонија“ во рамки на проектот „{Заедно} до зелени идеи“.
Инаку, „За почиста Македонија“ досега има иницирано повеќе акции кај Аквадуктот, скопското Кале, кејот на Вардар, Матка, Марков манастир… а на последната чистка кај Штип учестуваа над 130 доброволци од Штип, Скопје, Куманово, Велес, па и дури некој дојден од Колумбија и Чешка.
Сите заедно ја претворија шумата од депонија во излетничко место за уживање во природа.
Бојан Шашевски
