Агресивното однесување во раната адолесценција може да биде поврзано со побрзо биолошко стареење и повисок индекс на телесна маса до 30-тата година од животот, покажува ново научно истражување објавено во списанието Health Psychology.
Студијата ја следела групата од 121 ученик – 46 момчиња и 75 девојчиња – од урбани и приградски средини во југоисточниот дел на САД. Истражувачите ги набљудувале учесниците од 13-годишна возраст па сè до зрелоста, собирајќи податоци за нивното однесување, односите со врсниците и семејните конфликти. Кога испитаниците наполниле 30 години, научниците го процениле нивното биолошко стареење преку биомаркери од крвта.
„Оваа студија ги истакнува потенцијалните долгорочни здравствени последици што произлегуваат од социјалните предизвици во раната адолесценција. Забрзаното стареење е поврзано со зголемен ризик од болести на коронарните артерии, дијабетес, висок крвен притисок, воспаленија, па дури и прерана смрт“, изјави Џозеф Ален, истражувач од Универзитетот во Вирџинија.
Научниците анализирале 12 биолошки показатели, меѓу кои C-реактивниот протеин, нивото на шеќер во крвта и бројот на бели крвни клетки. Потоа користеле алгоритам кој ги комбинира овие податоци за да ја процени биолошката возраст на човекот.
Резултатите покажале дека повисокото ниво на агресија во раната адолесценција е поврзано со понапредна биолошка возраст до 30-тата година, дури и кога се земаат предвид фактори како полот, приходот на семејството и здравствената состојба во детството.
Сепак, истражувачите нагласуваат дека самата агресија не е директна причина за побрзо стареење. Клучна улога имаат долготрајните проблеми во односите со родителите и врсниците, кои често произлегуваат од агресивното однесување во тинејџерските години.
Според научниците, резултатите покажуваат колку е важно на младите навреме да им се помогне да изградат здрави односи, бидејќи тие можат да имаат значително влијание врз физичкото и менталното здравје подоцна во животот.
