Иницијативата Стоп за Вардариште информира дека во петок, 26 септември, освен закажаниот протест во 18 часот, ќе се одржи и утрински протест со почеток во 7:30 часот. Протестот ќе биде со блокада на мостот „Близнаци“ кој ги поврзува општините Аеродром и Гази Баба.
„Ги повикуваме работодавците да покажат разбирање и толеранција кон вработените кои евентуално ќе задоцнат на работа и ги замолуваме возачите на разбирање. Го преземаме овој чекор поради истекување на рокот од 5 дена, кој го дадовме за започнување на исполнување на итните барања“, истакнуваат од иницијативата.
Тие бараат воспоставување 24-часовен јавно достапен видео-надзор на депонијата Вардариште, воспоставување 24-часовно физичко обезбедување на Вардариште, итно иселување и соодветно згрижување на лицата кои живеат бесправно на територијата на Вардариште, поставување на ограда околу Вардариште, започнување на процес за конечно затворање на Вардариште, откривање и казнување на потпалувачите и организаторите на пожарите, како и ригорозни мерки против граѓани и правни субјекти кои ќе продолжат да фрлаат отпад во Вардариште.
„Барањата беа доставени до претседателката на Македонија, Владата на Македонија, Министерство за животна средина и просторно планирање, Министерство за внатрешни работи, Министерство за социјални политики, демографија и млади, Град Скопје, Општина Гази Баба и Општина Аеродром. До сега, не добивме одговор од ниту една институција“, посочуваат од Стоп за Вардариште.
Оттаму ги повикуваат сите граѓани да се приклучат бидејќи, како што велат, чист воздух е приоритет за сите нас.
