Отворањето на самостојната изложба на Мила Добревска насловена „Наследена носија“ ќе се случи во четврток, 25 септември, со почеток од 20 часот во галеријата „Пионери“.
„’Наследена носија’ го пресликува духот на македонската жена, преточувајќи ги традиционалните вредности во нови обележја на современото однесување. Во овој контекст наследените носии не се само облеката што ја носиме, туку и начинот на кој се претставуваме и како другите нè перцепираат, одразувајќи ги наследните особини и тенденции што нè прават препознатливи“, појаснува Добревска.
Како што вели таа, Изложбата се обраќа на помладата генерација како потсетник, токму за овие вредности и доблести кои остануваат нераскинлив дел од нас: добрина, љубов, критичка свест, истрајност и снаодливост. Овие карактеристики се претставени преку дуалистичка интерпретација на минатото и сегашноста, со споредби, хармонии, испреплетувања, создавајќи нови толкувања и адаптации.
„Инспирирана од традиционалната орнаментика и вез, ги преиспитувам и прилагодувам основните елементи на уметноста: боја, линија, површина, форма, материјал и простор користејќи рачно-моделирана цементна маса, површини посипани со стакло и иновативни техники на ткаење и сликање. Наследените вредности се преточуваат во нови форми кои смело се приклонуваaт кон современиот општествен контекст“, додава уметницата.
Изложбата е поддржана од Министерството за култура и туризам на Македонија.
