„Маските како лице на денешницата“ од Бојана Мандевска и „Моќ во боја“ на Филип Матевски се двете самостојни изложби кои ќе се отворат на 2 септември со почеток во 19 часот во Галерија 2 во Младинскиот културен центар (МКЦ) во Скопје.
„Изложбата на Бојана Мандевска претставува колекција од рачно изработени глинени маски, кои ја отсликуваат внатрешната приказна на авторката – емоции, мисли и искуства, преточени во ликови инспирирани од секојдневието, околината и општеството. Маските носат силна социјална и психолошка порака, поставувајќи прашања за лицата што ги носиме во современото време“, се вели во најавата.
Проектот е реализиран со поддршка на Министерството за култура на Македонија, како проект од национален интерес во областа на визуелните уметности, архитектура и дизајн за 2025 година.
„’Моќ во боја’ на Филип Матевски е визуелно патување кое ја слави женственоста – не само како симбол на физичка сила и убавина, туку пред сè како израз на интелект, храброст и длабочина. Преку 14 дигитални илустрации создадени во духот на поп-артот, инспирирани од аниме, стрипови и филмска естетика, авторот Филип Матевски нуди свеж и динамичен поглед кон улогата на современите хероини“, се вели во соопштението за изложбата на Матевски.
Како што пишува таму, секој лик е прикажан како лидерка, икона или како секојдневна личност што носи свои борби и триумфи. Од ранливост до непоколебливост, од емпатија до моќ, илустрациите отвораат поширока приказна за искуството и значењето на женскиот идентитет во општеството.
„Живите и контрастни бои не се случајни – тие ја симболизираат енергијата и свежината што уметноста може да ја внесе во културната сцена. ‘Моќ во боја’ е повеќе од изложба: тоа е повик за ново вреднување на уникатноста, талентите и придонесот што женскиот сензибилитет го носи во културата и заедницата“, додаваат организаторите.
Со овој проект, потенцираат тие, Матевски ги обединува световите на поп-културата и уметноста, покажувајќи дека анимето, стриповите и филмовите можат да бидат подеднакво силни медиуми за инспирација и уметнички израз. Изложбата претставува и обид за интеграција на современите визуелни медиуми во македонската културна сцена, отворајќи простор за нови дијалози и погледи кон уметноста.
Изложбите траат до 14 септември.
