На раскрсницата на ТЦ „Глобал“ во Струмица на 24 јануари од 12 часот ќе започне протест инициран од „Здрава котлина“.
„Дојде денот кога повторно сме принудени да излеземе на улица, и да го изкажеме нашиот заеднички револт против аерозагадувањето. Властите се менуваат. Функциите се менуваат. Но, едно нешто останува исто: ние и понатаму дишеме отров. Со години слушаме ветувања за ‘чист воздух’, ‘стратегии’, ‘мерки’ и ‘планови’. А што добивме? Ништо. Молк. Институционална негрижа“, стои во повикот на „Здрава котлина“.
Според еко-активистите, моменталната состојба во јужниот дел на градот е алармантна.
Како што велат, според мерењата, изложеноста на ПМ честичките е еквивалентна на пушење 7 цигари дневно.
„Некој ќе рече: ‘7 цигари не се многу’. Но запрашајте се: Кој ги ‘пуши’ тие цигари? Само ти, или и твоето дете? Бебето во количка? Бремените жени? Старите лица? Луѓето со хронични болести, астма, срцеви и респираторни проблеми? Доста е! Доста е од неказнети загадувачи, инспекции само на хартија, институции што ‘не гледаат’ и ‘не слушаат’, систем кој ги штити трујачите, а не граѓаните“, велат од „Здрава котлина“.
Тие посчуваат дека „ова не е зима, туку е проблем цела година“ и дека „ова не е неминовно и ова е дозволено“.
„Ова не е политика. Ова е право на живот. Ги повикуваме сите граѓани – родители, млади, пензионери, работници, студенти – да излеземе во што помасовен број и заедно да кажеме: Стоп на аерозагадувањето. Стоп на трујачите. Стоп на институционалната негрижа. Крај на воздушната апокалипса“, се вели во повикот за протестот на 24 јануари.
