Министерот за здравство Венко Филипче во видео порака до јавноста вели дека состојбата со Ковид-19 е критична, а болниците веќе ги полнат сите капацитети.
„Пред нас е веројатно најтешкиот период на справување со пандемијата. Барам сите да бидеме максимално одговорни и свесни за сериозноста на состојбата. Вирусот е широко проширен. Секое најмало невнимание или непочитување на мерките за заштита може да значи инфекција. Сега ни е потребна поддршка повеќе од било кога во изминатите осум месеци. Тоа што го бараме како здравствени работници е навистина малку – само да го штитите сопственото здравје“, рече министерот Филипче.
Тој потенцираше дека сите граѓани жртвуваат нешто во своите животи оваа година.
„За некои од нас жртвата значеше помалку финансии, загубена работа, неможност да се видиме со нашите блиски. За други тоа значеше месеци и месеци непрекината работа без одмор. За трети пак таа жртва значеше загубено здравје или загубен живот. Колку доследно ќе ги почитуваме мерките за заштита ќе биде одлучувачки за тоа колку дополнително ќе се жртвуваме до крајот на пандемијата. Секој за себе ќе реши дали неговата жртва ќе е носењето маска, негрупирањето, држењето дистанца, или пак жртвата ќе значи продолжување на здравствената и економска несигурност. Изборот е тој, а моќта за промена на работите е кај секој од нас. Почитувајте ги мерките доследно. Носењето маска и држењето дистанца се многу мала жртва во споредба со се друго“, посочи Филипче.
Последнава недела бројките секојдневно се движат на нови преку илјада заразени лица со Ковид-19, додека дневната бројка на починати постојано бележи двоцифрени бројки.
Вкупната бројка на Ковид дијагностицирани во Северна Македонија од почетокот на епидемијата изнесува 38.782, бројката на оздравени пациенти е 23.011, на починати е 1.110, а бројот на активни случаи изнесува 14.661.
Радио МОФ изминатава недела објави инфографик во кој ги споредувавме бројките помеѓу Северна Македонија и други девет држави од регионот. Бројките во графиконите се според податоците заклучно со 2 ноември. Статистиките може да ги видите на линкот во продолжение:
[Инфографик] Како С. Македонија се справува со Ковид-19 во споредба со регионот?