На владина седница денеска беше усвоена Стратегијата на Владата на Македонија за соработка и развој на граѓанското општество со Акциски план 2025–2028.
„По инклузивен, транспарентен и длабоко консултативен процес со граѓанското општество, државните институции и нашите меѓународни партнери, денес Владата го усвои стратешкиот документ кој ќе ги води државните политики за зајакнување на граѓанскиот сектор во наредните четири години“, соопштуваат од Владата.
Според Владата, Стратегијата 2025–2028 е фокусирана на две приоритетни области: создавање поволна средина за функционирање и развој на граѓанското општество, како и зајакнување на партнерството помеѓу граѓанските организации и јавните институции.
„Овој документ е резултат на заедничка посветеност и отворен дијалог – почнувајќи од јавниот повик во ноември 2024 година, заедничката работна група со граѓанските организации, консултациите преку платформата ЕНЕР, јавните расправи со поддршка од Центарот за ресурси за граѓански организации, па сè до интегрирањето на препораките и коментарите добиени од пошироката граѓанска заедница и институциите. Позитивната оценка дадена од Советот за соработка меѓу Владата и граѓанското општество го потврдува квалитетот и посветеноста зад овој документ“, стои во соопштението на Владата.
Од таму велат дека нивната визија е јасна, односно „да изградиме инклузивен, независен и професионален граѓански сектор кој ќе делува како стратешки партнер на институциите во креирањето и спроведувањето на јавните политики“.
„Сега започнува спроведувањето на Стратегијата и Акцискиот план, со посебен акцент на изградба на ефикасни механизми за мониторинг и евалуација, преку подготовка на пасоши на индикатори во тесна соработка со граѓанските организации. Оваа стратегија не е само формален документ – таа е конкретна заложба за зајакнување на улогата на граѓанското општество во демократскиот живот на нашата земја. Заедно градиме поодговорни институции, поправедни политики и поодржлива демократија“, се вели во соопштението на Владата.
