„Не знаеме зошто нашиот универзум не се самоуништува“, тврдат некои од најреномираните физичари во светот, кои имаат проблем да откријат зошто универзумот не се уништил во истиот момент кога бил створен.
Според стандардниот модел предвидено е дека во Биг Бенг (моментот на создавање на универзумот), имало еднаква количина на материја и антиматерија. Проблемот е што според теоријата тие би требало да се поништат меѓусебно, што би значело дека не би останала никаква материја од која би се создале галаксиите, планетите или живиот свет.
Ова прашање останува една од најголемите мистерии на модерната физика, а за нејзино разјаснување физичарите претпоставуваат дека, покрај електричниот полнеж, мора да постои некоја друга разлика помеѓу материјата и антиматеријата која би можела да објасни зошто материјата „триумфирала“ во двобојот со антиматеријата.
Нова студија на Европската организација за нуклеарно истражување (ЦЕРН) открива дека најверојатно не станува збор за нивниот магнетизам.
Физичарите од овој научен институт во Швајцарија работеле со досега најпрецизните технологии за мерење на магнетниот момент на анти-протонот и откриле дека тој е потполно ист како оној на протонот, само со спротивен полнеж. Студијата е објавена во списанието Nature.
„Сите наши проучувања наидуваат на целосна симетрија помеѓу материјата и антиматеријата, поради што универзумот, всушност, не треба да постои“, објаснува Кристијан Смора, авторот на студијата, спроведена во ЦЕРН.
„Асиметријата мора да постои некаде, но, едноставно ние не можеме да разбереме во што е разликата. Кој е изворот на прекршување на симетријата?“, додава тој.
Научниците досега тестирале повеќе различни можности, од различна маса, електричен напон, или некои сосема други карактеристики – но разлика, засега, нема.
Сепак магнетниот момент на анти-протонот била карактеристика која досега, во споредба со другите физички карактеристики, била многу потешка за прецизно мерење.
Децелератор на антипротони, каде се произведуваат анти-атоми и анти-протони за проучување на антиматеријата / ФОТО: ЦЕРН
За последното истражување било потребно да се создаде најдолготрајниот примерок на антиматерија досега, додека научниот тим создаде анти-протони во 2015 година и успешно ги складираше повеќе од една година заробени во специјална „Пенингова замка“, бидејќи чувањето на антиматерија во физички склад не е возможен.
Новите мерења, биле прецизни до деветтата цифра, што претставува 350 пати попрецизно мерење од сите досегашни.
„Резултатите се кулминација на долгогодишни истражувања и развој и успешното комплетирање на едно од најтешките изведени мерења во нашата историја во инструментот базиран на Пенинговата замка“, изјавил Стефан Улмер, портпарол на групата научници кои учествувале во истражувањето.
Најголемата игра на „пронајди ја разликата“ продолжува и понатаму. Научниците се надеваат дека ќе можат да ги набљудуваат анти-протоните во уште попрецизни детали и да забележат некаква разлика кога ќе погледнат уште подлабоко во оваа мистерија.
Сепак, други научници разгледуваат и други можности – вклучително и можноста антиматеријата да има спротивна гравитација, што поедноставено би значело одговор на прашањето дали таа може да паѓа нагоре.