Сараево од 19 до 22 мај оваа година по деветти пат ќе биде домаќин на интернационалниот фестивал „Денови на архитектура“(Dani Arhitekture) кој годинава е под мотото „Архитектурата пред инвестициите“.
На настанот ќе говорат истакнати архитекти од регионот и Европа како Идис Турато од Хрватска, групацијата Њириќс+архитекти од Хрватска, Ериксен Скајаа од Норвешка, Никола Узуновски од Македонија, Нерма Линсберг од Австрија, архитектите на КонтраСтудио од Србија , студиото Сома од Австија, A69 од Чешка и многу други.
Фестивалот покрај предавањата и конференциите нуди и пропратна богата програма со изложби, перформанси, видео мапирање, филмски проекции и презенатации на студентски трудови.
Тимот на „Dani Arhitekture” ги повикува студентите по архитектура од Македонија да земат учество на отворените конкурси за изложбата DAInsta exhibition и Pecha Kucha. Настанот, појаснуваат организаторите, освен за студенти е отворен и за искусните архитекти како одлична можност да споделат ставови и искуства со колегите од различни земји.
„Dani arhitekture” започнаа во 2008 година како студентска иницијатива која во текот на годините се разви во еден од најважните, како архитектонски така и културен настан во Босна и Херцеговина. Во претходните осум изданија, фестивалот беше домаќин на повеќе од 50 говорници од 20 земји и организатор на бројни изложби и филмски проекции.