„Овој 1 септември не го означуваме почетокот на учебната година, туку 10 месеци од падот на настрешницата. Се сеќаваме на трагедијата, бараме одговорност, се бориме за подобра земја. Не ги вртиме главите. Заедно до крај“, напишаа студентите во блокада на факултетите во Србија на својот Инстаграм профил, најавувајќи го протестот на 1 септември, со цел да ги поддржат средношколците кои најавија голем протест пред неколку дена.
Тие објавија и мапа од комеморативната прошетка што ќе започне во понеделник во 18:30 часот, пренесува Н1.
Прошетката ќе започне од Старата главна железничка станица, преку Немањина до зградата на Министерството за образование, потоа СКЦ и Уставниот суд, зградата на РТС, до Плоштадот на Републиката.
„Оставете ги свирчињата дома“, порачаа студентите.
View this post on Instagram
Средношколците во блокада од градовите низ цела Србија најавија протест за 1 септември „Средношколците се сеќаваат – сите сме под настрешница“.
Како што дознава Нова.рс, на првиот училишен ден, матурантите, со поддршка на родителите, дел од наставниците, но и учениците во блокада, ќе одржат комеморативна прошетка по повод 10 месеци од падот на настрешницата, а во некои училишта од директорите е побарано тој ден да биде ненаставен, односно неработен за сите, освен за прием на нови ученици – првооделенци.
