Студентите од Србија кои 16 дена трчаа од Нови Сад до Брисел, денес ќе имаат состаноци во Европскиот парламент. Пред да влезат во зградата на оваа институција, тие на емотивен начин им оддадоа почит на жртвите од падот на настрешницата во Нови Сад, пренесува Н1.
Шеснаесет студенти-тркачи, еден по еден, тивко ги соблекоа своите патики во кои истрчаа речиси 2.000 километри, а покрај нив поставија цвеќиња и црни хартии на кои беа напишани годините на раѓање и смрт на сите жртви на трагедијата.
Денес, утре и задутре, тие ќе имаат можност да разговараат во европските институции, со неколку политички личности кои имаат директни врски со процесот на проширување на Европската Унија, како и со процесот на демократизација на земјите кои сакаат да станат членки.
Првата средба со повеќе од 50 европратеници од четири политички групи се одржува во Европскиот парламент. Станува збор за Европската народна партија, Социјалдемократите, Либералите и Зелените, кои ја сочинуваат владејачката коалиција на ниво на Европската унија.
Потоа, студентите ќе се сретнат и со претседателот на Комитетот за надворешна политика, Дејвид Мекалистер, кој во еден од своите претходни мандати имаше директно портфолио за прашањето на Србија, а долго време беше на чело на овој комитет за надворешна политика.
Во доцните попладневни часови, тие треба да го посетат и Комитетот на регионите и да разговараат со раководителите на таа институција.
