Со дебата за младите во политиката и општеството отворен Претседателскиот центар за политичко образование

Со дебата на тема „Иднината на демократијата – младите во политиката и општеството“, на која учествуваа млади од невладиниот сектор, денеска се одржа инаугуративен настан на новиот Претседателски центар за политичко образование.

Центарот е еден од клучните проекти од програмата на Претседателот на Република Северна Македонија, Стево Пендаровски, а се реализира во насока на заложбите за јакнење на демократските политички вредности, промоција и заштита на човековите права и слободи, политичкиот плурализам, меѓусебната толеранција, заедништво и солидарност.

Претседателот Пендаровски најави дека во следниот период преку новиот Претседателски центар планирана е реализација на едукативни настани, дебати за важни општествени прашања, научни конференции, стручни дискусии, како и школа за политика, со еминентни предавачи и тренери од земјата и од странство.

„Верувам дека со работата на Центарот ќе придонесеме за промоција на културата на дијалог и ќе влијаеме во реформата на образованието преку сеопфатно вклучување на политичкото образование во нашиот формален и неформален образовен систем. Водени од визијата за јакнење на демократијата, промоција и заштита на човековите права и слободи, политичкиот плурализам, меѓусебната толеранција и солидарност, убеден сум дека заеднички ќе ја постигнеме целта“, рече Пендаровски.

На настанот беше потпишан меморандум за соработка помеѓу Кабинетот на Претседателот на Република Северна Македонија и партнерските фондации и организации: фондацијата „Фридрих Еберт“ за Северна Македонија, Меѓународниот републикански институт (ИРИ), фондацијата „МК2025“, фондацијата „Конрад Аденауер”, фондацијата за демократија на Вестминстер во Северна Македонија и Националниот демократски институт (НДИ).