Премиерата на претставата „Ангели во Америка“ од Тони Кушнер ќе се одигра утревечер, 1 септември, со почеток во 20 часот во Македонскиот народен театар. Режисер е Филип Петковски, а играат Јордан Симонов, Александар Стоименовски, Стефан Спасов, Илин Јовановски, Наталија Теодосиева, Тања Кочовска, Дамјан Цветановски и Нела Павловска.
„Кога зборуваме за големите американски драмски текстови, најчесто ги спомнуваме великаните како Тенеси Вилијамс, Артур Милер или Дејвид Мамет, чии дела се сè уште продуцирани во сите театри низ светот. Во 1991 година, инспириран од случки од неговиот приватен живот, Тони Кушнер ја пишува Ангели во Америка: Среќна фантазија на национални теми— дело кое засекогаш ќе ја промени светската театарска историја, а Кушнер ќе го смести како еден од највлијателните американски драматурзи“, истакнуваат од МНТ.
Претставата ја добива Пулицеровата награда за драма, наградата Тони, како и речиси сите други значајни признанија во театарот, токму поради нејзината способност да го претвори театарот во моќна алатка за општествени коментари, комбинирајќи извонредна драматуршка структура, акцент на актерската игра и симболични сцени кои и денес звучат релевантно, додаваат оттаму.
„Приказната се случува во Њујорк кон средината на 1980-тите, кога со САД владее Роналд Реган – ера обележана со конзервативна политика која промовира таканаречени ‘семејни вредности’ и тивка, но погубна, јавна незаинтересираност за епидемијата на сида. Во овој политички и општествен превир, Кушнер се фокусира на четири геј ликови: Прајор Волтер, кој штотуку дознава дека е ХИВ-позитивен; неговиот партнер Луис, кој се бори со стравот од болеста и немоќта да му помогне на партнерот; Џо Пит, Мормон и скриен геј маж кој се справува со својата религија и сексуална ориентација; и Харпер, неговата сопруга која е зависна од апчиња и често бега во свет на халуцинации за да го издржи распадот на нивниот брак. Овие приказни се испреплетуваат и со реални историски личности, како познатиот адвокат Рој Кон кој јавно ја негирал сопствената хомосексуалност, но на крајот умира од сида“, појаснуваат од МНТ.
Наместо да се фокусира на стереотипни и комични прикази на квир луѓето, претставата се фокусира на приказни за љубов под незамислив притисок, за страв и храброст, за вера и сомнеж, за човечката потреба да се најде надеж дури и кога светот изгледа решен да ја уништи. Сидата во оваа претстава не е само болест – таа е и симбол за начинот на кој општеството се однесува кон сите оние кои се ранливи, особено во ситуации кога е политички „погодно“ да ја свртиме главата настрана, потенцираат од театарот.
Билетите се достапни на билетарницата во МНТ секој работен ден од 12:00 – 20:00 часот и онлајн преку www.mnt.mk. Следна изведба – 2 септември во 20 часот.
Сценограф е Мартин Манев, костимограф – Антонија Гугинска Јорданоска, дизајн на светло – Дарко Младеновски, дизајнот на постерот е на Ивана Мојсовска Головска, а дизајнот на звук на Давид Николовски. Кореограф е Иван Ангелковски, за фотографија и камера е задолжен Марко Марјановиќ, за визуелниот дизајн – Ивана Мојсовска Головска, а за камера и монтажа Борјан Стојков.
Асистенти се Оливија Трајковска и Антонија Белазелковска, инспициент е Вукица Александрова, продуценти се Петар Антевски и Филип Петковски, додека суфлер е Мирослав Атанасовски. Светло-мајстор е Горјан Темелковски, тон-мајстор – Александар Арсиќ, манипуланти се Васко Бојаџиски, Трајче Тасевски и Горан Димов.
Реквизитери се Соња Крстевска и Данил Цветковски, гардеробери Валентина Чонкова, Скендер Бериша и Елизабета Стамчевска, а шминкери и фризер: Бранка Пљачковска и Лора Спасовска. Декоратери – Ибрахим Рамановски, Дурмиш Сефер, Нерхан Османовски и Горјан Здравевски.
Претставата не се препорачува за лица помлади од 16 години.
Претставата е подржана од Министерството за култура и туризам на Македонија, „Europe House Skopje“, Германската амбасада во Скопје, Здружението Заедно посилни и „Gilead Sciences Europe LTD“.
