Ново рочиште против Демири за учество во протестите на Шарената револуција

Денес во 12 часот има ново рочиште од судскиот прогон против нашиот член Мариглен Демири за неговото учество во протестите минатата година. Голготата продолжува. Но и борбата, соопштија од партијата Левица.

На претходното рочиште во јануари Демири се изјасни за невин, откако беше прочитано обвинението против него. Јавното обвинителство го товари дека кршел и фрлал предмети и заедно со толпа граѓани на 13 април ја оштетиле народната канцеларија на претседателот Ѓорге Иванов, за време на протестите против аболицијата на 56 функционери и нивни соработници, главно поврзани со случаите со прислушувањето.

Според проценките направени од вештачењето, државата од Демири бара оштета од 522.000 денари (близу 8.500 евра). Одбраната го оспори вештачењето и рече дека е направено на незаконски начин.

Инаку, освен Демири, судски процес за учество на протестите уште од лани се започнати и против други членови од Левица – Здравко Савески и Владимир Куновски. Од оваа партија рекоа дека е ова прогон на нивните членови и Левица претставува трн во окото за многумина.