Со барање за оставка на претседателот на државата Ѓорѓе Иванов, но и одложување на изборите најавени на 5 јуни, се до создавањето услови тие да бидат фер и демократски, голем број граѓани и денеска излегоа на протест во Скопје, кој започна пред Специјалното јавно обвинителство.
Скандирајќи ја познатата парола на овие протести „Нема правда, нема мир“, демонстрантите се упатија кон Собранието.
Како што јавува репортерката на радио МОФ од теренот, протестот засега минува во мирна атмосфера.
Полициско обезбедување ги следи демонстрантите, но во далеку помал број од изминатите денови кога истовремено се одржуваа и контра-протести на неколку стотина метри оддалеченост.
На почетокот на протестот на присутните им беа поделени флаери со насоки како треба да се однесуваат при судир со полицијата или доколку има насилство во текот на протестот, со цел да се зачува нивната безбедност.
Освен во Скопје, денеска се протестира и во Штип , Струмица, Велес , Битола и Куманово.