Сојузот на синдикати на Македонија доби отворена поддршка од Европска конфедерација на синдикати во своите барања за зголемување на минималната плата и раст на останатите примања на работниците.
Во писмото испратено до претседателот на ССМ, Слободан Трендафилов, од европската синдикална организација оценуваат дека активностите на македонскиот синдикат се оправдани и во интерес на работниците. Тие посочуваат дека иницијативите за повисоки плати и посилно колективно договарање се одговор на реалните економски притисоци со кои се соочуваат граѓаните, особено во услови на растечки трошоци за живот и нестабилност.
Од Конфедерацијата нагласуваат дека борбата за достоинствени услови за работа и живот претставува темелна синдикална вредност и е усогласена со европските и меѓународните стандарди за труд.
Воедно, европските синдикалци изразуваат сериозна загриженост поради информации за притисоци и закани кон синдикални претставници. Според нив, каква било форма на заплашување или обид за влијание врз синдикалните лидери и нивните семејства е недозволива и спротивна на демократските принципи.
Тие потсетуваат дека правото на здружување, колективно преговарање и организирање штрајк се загарантирани со конвенциите на Меѓународната организација на трудот и европските документи за човекови права и мора да се применуваат и во законите и во праксата.
Од Европската конфедерација на синдикати најавуваат дека ќе продолжат внимателно да ја следат состојбата и, доколку има потреба, ќе реагираат и на европско ниво.
Фото: ССМ Мета
