Државен натпревар на млади техничари и природници

Во организација на Сојузот на клубовите на младите техничари и природници на Македонија, денеска во Пехчево ќе се одржи 51. Државен натпревар.

Државен натпревар на млади техничари и природници

На натпреварот ќе учествуваат 312 ученици од основните училишта од Република Македонија кои освоиле први места на регионалните натпревари, пренесе МИА.

Учениците ќе се натпреваруваат во 23 дисциплини: агротехника, автоматика, астрономија, астронаутика, бродомоделарство, воздухопловно моделарство, градежништво и архитектура, екологија, електроника, конструкторство, метеорологија, кино и видео техника, компјутерска техника, применета биологија, применета географија, применета математика, применета физика, применета хемија, радио техника, ракетно моделарство, роботика, сообраќајно моделарство и фото техника.

Повеќе од сто ментори на учениците ќе бидат присутни на натпреварот, а оценувачките комисии се составени од наставници, универзитетски професори и соработници.

Добиените дипломи се вреднуваат за стипендии што ги доделува Министерството за образование и наука на Република Македонија.

– Републичкиот натпревар на млади техничари и природници, по 51 пат, на едно место ќе ги собере талентираните основци во природните и техничките науки. Тие ќе имаат можност да ги презентираат своите проекти на кои работеле заедно со нивните наставници во текот на оваа учебна година, но истовремено да стекнат и нови знаења од областите во кои што се натпреваруваат, вели Христина Спасевска претседател на Сојузот на здруженија за техничка култура на Македонија- Народна техника.

Целта на натпреварите е да го поттикнат иновативниот дух кај младите и уште од најрана возраст да ги развивијат нивните презентациски и натпреварувачки способности.

Натпреварите се поддржани од Министерството за образование и наука, локалната самоуправа на општина Пехчево и Електрани на Македонија.