Советот на Струшките вечери на поезијата ја додели престижната награда „Златен венец“ за 2026 година на холандската поетеса Анеке Брасинга, за нејзиното севкупно поетско творештво и значајниот придонес во современата европска и светска поезија.
Анеке Брасинга се истакнува со исклучителна јазична инвентивност, богата метафоричност и силна имагинативна енергија. Нејзиниот поетски јазик е густ, барокно разигран, полн со неочекувани зборовни споеви, неологизми и звучни асоцијации, кои се спојуваат со филозофска длабочина и суптилна иронија, создавајќи уникатна поетска атмосфера. Критичарите ја опишуваат како „магионичар на јазикот“, која ја истражува границата меѓу значењето и звучноста на зборот, стои во одлуката на Советот.
Се наведува и дека нејзиното творештво вклучува мотиви на природата, љубовта, кревкоста на убавината и ранливоста на јазикот, како и длабоки егзистенцијални прашања за човековата судбина, меморијата и времето.
Поезијата на Брасинга се движи меѓу реалното и надреалното, создавајќи свет каде се судираат духовното и материјалното, интимното искуство и универзалните теми на човечкото постоење. Со својот оригинален глас, јазична храброст и длабочина на мислата, Брасинга се вбројува меѓу најзначајните современи поети на холандската литература и влијателни европски поетски гласови. Нејзиното дело ја проширува можноста на поетскиот јазик и ја потврдува поезијата како простор на слобода, имагинација и духовно истражување.велат од Советот на Струшките вечери на поезијата
Со „Златниот венец“ за 2026 година, Струшките вечери на поезијата ја изразуваат својата почит кон Анеке Брасинга и нејзиниот траен придонес во современата светска поезија.
