Студентите имаат рок до 5 март да аплицираат за субвенциониран студентски оброк за академската 2025/2026 година, информира Министерството за образование и наука.
Правото на субвенциониран студентски оброк можат да го користат сите редовни студенти на додипломски студии чиј месечен приход е помал од минималната нето-плата. Ова право важи и за студентите запишани на постдипломски и интегрирани студии на државните и приватните универзитети во земјава.
Од Министерството појаснуваат дека студентите кои ги исполнуваат условите, а досега не поднеле апликација, можат електронски да поднесат барање преку официјалниот портал за електронски услуги на Министерството. На платформата се објавени и сите критериуми за остварување на правото, како и контакт информации за поддршка при процесот на аплицирање.
Можност за повторно аплицирање имаат и студентите на кои претходно им било прекинато правото на субвенциониран студентски оброк, доколку сметаат дека ги исполнуваат условите предвидени со програмата.
Овој рок важи и за студентите кои не поднеле апликација во претходните активни рокови. Надлежните апелираат студентите навреме да ја поднесат потребната документација за да можат да го користат правото на финансиска поддршка за студентски оброк во текот на академската година.
Субвенционираниот студентски оброк е мерка со која државата обезбедува финансиска поддршка за студентите со цел да се олеснат трошоците за исхрана за време на студирањето.
Фото: Freepik
