Жири-комисијата за наградата „Роман на годината“ за 2025 година, што ја доделува Фондацијата „Славко Јаневски“, ја објави втората селекција на романи што остануваат во трка за престижното признание.
Комисијата работи во состав: Калина Малеска (минатогодишна лауреатка и претседателка на жирито), Иван Антоновски, Ивана Трајаноска, Иван Шопов и Катерина Богоева како претставничка на Фондацијата. Во оваа фаза од изборот се издвоени 11 романи што остануваат во конкуренција.
Годинава интересот за наградата е значителен. На конкурсот пристигнале вкупно 46 романи од македонски автори. Во првата селекција жирито избра 22 наслова, а по дополнителната евалуација списокот е скратен на 11 дела.
Според пропозициите на наградата, името на авторот и насловот на романот добитник ќе бидат соопштени на прес-конференција на 13 март. Настанот ќе се одржи во просториите на Друштвото на писателите на Македонија во Скопје.
Наградата „Роман на годината“ се доделува по 27-ми пат и претставува едно од најзначајните книжевни признанија во земјата. Генерален покровител на наградата е Комерцијална банка АД Скопје, а поддршка обезбедува и Министерството за култура и туризам на Република Македонија.
Признанието се состои од плакета, уникатна статуетка и парична награда во износ од 150.000 денари.
Минатата година наградата ја доби романот „Светот што го избрав“ од Калина Малеска, објавен во издание на издавачката куќа „Или-или“. Жирито тогаш го истакна делото како значаен придонес во современата македонска книжевност.
