Со цел да се истакне суштинската улога на академијата во оснажувањето на младите како активни агенти на одржливиот развој, Филозофски факултет при Универзитет „Св. Кирил и Методиј“ ја отвори 8-та Меѓународна недела за Целите за одржлив развој (SDGs), во соработка со Обединети нации.
Под наслов „Поттикнување на младинската извонредност: Придонесот на општествените и хуманистичките науки во постигнувањето на Целите за одржлив развој (SDGs)“, настанот обединува професори, истражувачи, студенти, претставници на дипломатскиот кор и тимот на ОН во земјата, во заедничка дебата за улогата на младите како двигатели на инклузивни и одржливи општества. Целта е да се промовира интердисциплинарна соработка и размена на знаење во поддршка на одржливиот развој, потенцираат од организацијата.
Во рамки на отворањето беше промовирана Универзитетската коалиција SustainED, формирана од осум акредитирани универзитети во партнерство со ОН. Членки на коалицијата се: Универзитет „Св. Кирил и Методиј“, Универзитет „Гоце Делчев“, Универзитет на Југоисточна Европа, Универзитет „Св. Климент Охридски“, Универзитет „Мајка Тереза“, Меѓународен балкански универзитет, Универзитет Американ Колеџ Скопје и Државен универзитет во Тетово. Коалицијата има за цел интеграција на SDGs во наставните програми, истражувањата и студентскиот ангажман, како и институционализирање на улогата на високото образование во имплементацијата на Агендата 2030.
Ректорката проф. д-р Билјана Ангелова истакна дека универзитетите имаат клучна улога во градењето одржливи и инклузивни општества, нагласувајќи дека младинската извонредност подразбира и етичка одговорност и активен општествен придонес. Деканот проф. д-р Оливер Бакрески посочи дека соработката со ОН се темели на заеднички вредности – достоинство, еднаквост и одржлив развој.
Коалицијата ќе воспостави Академска SDG платформа за мапирање и мониторинг на академските активности поврзани со SDGs, обезбедувајќи мерлив и стратешки национален придонес кон одржливиот развој.
Извор: United Nations
