Првиот македонски долгометражен анимиран филм „Јон Вардар против Галаксијата“ во сценарио и режија на Гоце Цветановски ќе биде прикажан на 21. издание на фестивалот за фантастични филмови и вино во Љутомер, Словенија. Проекцијата е закажана за сабота, 5 јули, во Домот на културата.
„Овој фестивал за мене има посебно значење, затоа што во 2016 година гостував со краток анимиран филм и тогаш ја имав честа да се запознаам со Јан Харлан, продуцентот на Стенли Кјубрик – еден од моите омилени режисери, чие влијание може да се забележи во повеќе сцени од ‘Јон Вардар’“, вели режисерот Гоце Цветановски.
Според него интересно е што фестивалот, покрај внимателно селектираната програма од жанровски филмови, има и посебен фокус на виното. Посетителите ќе имаат можност да дегустираат различни вина за време на фестивалските настани, додава тој, создавајќи уникатно искуство кое ги спојува филмот и винската култура.
„Grossmann Fantastic Film & Wine Festival“ е дел од Европската асоцијација на фантастични филмски фестивали (European Fantastic Film Festivals Federation – EFFFF) и доделува награда Мелиес за најдобар европски фантастичен филм.
