Администрацијата на претседателот Доналд Трамп соопшти дека во саботата ќе распореди 2.000 припадници на Националната гарда, откако федерални агенти во Лос Анџелес се соочија со неколку стотини демонстранти за време на вториот ден од протестите, предизвикани од имиграциските рации, пренесува Ројтерс.
Секретарот за одбрана, Пит Хегсет, предупреди дека Пентагон е подготвен да мобилизира и активни војници доколку „насилството продолжи во Лос Анџелес“, додавајќи дека маринците од блиската база Кемп Пенделтон се „во состојба на висока готовност“.
Федерални безбедносни сили во саботата се соочија со демонстранти во областа Парамаунт, на југоистокот од Лос Анџелес, каде што некои од демонстрантите развејуваа мексикански знамиња. Втор протест се одржа во центарот на Лос Анџелес вчеравечер, каде што околу 60 луѓе извикуваа слогани, вклучувајќи и: „ICE надвор од Л.А.!“
Трамп потпиша претседателски меморандум со кој наредува распоредување на Националната гарда, со цел – како што наведе Белата куќа – „да се стави крај на беззаконието кое беше дозволено да се рашири“.
UPDATE: Several arrests have already been made for assault on a federal agent. ANY attack on our agents or officers will not be tolerated. You will be arrested and federally prosecuted. pic.twitter.com/wo7WIIZGxx
— Chief Michael W. Banks (@USBPChief) June 7, 2025
Гувернерот на Калифорнија, Гавин Њусом, ја оцени одлуката како „намерно провокативна“. Тој објави дека Трамп ја испраќа Националната гарда „не затоа што недостасува полиција, туку затоа што сака спектакл“, додавајќи: „Не им давајте спектакл. Никогаш не користете насилство. Изразете го својот глас мирно.“
Њусом исто така рече дека е „психопатско однесување“ тоа што Хегсет се заканува со распоредување на активни маринци на американска почва против сопствените граѓани.
Трамп, пак, напиша на неговата платформа Truth Social дека, ако Њусом и градоначалничката на Лос Анџелес, Карен Бас, „не можат да си ја вршат работата, тогаш федералната влада ќе интервенира и ќе го реши проблемот со БЕСПРАВЈЕТО И ГРАБЕЖИТЕ, онака како што треба да се реши!!!“
Овие протести го ставаат во судир демократски управуваниот Лос Анџелес – каде што, според пописните податоци, значителен дел од населението е хиспанско и родено во странство – со републиканската Белата куќа на Трамп, која го направи заострувањето на имиграциската политика главен белег на неговиот втор мандат.
