Премиерата на новата балетска продукција „Госпоѓа Бовари“, инспирирана од романот на Густав Флобер, ќе се одржи на 25 јуни со почеток во 20 часот на големата сцена на Националната опера и балет (НОБ).
„Ова сценско остварување е посветено на јубилејот од 25 години уметничка дејност на примабалерината Марија Кичевска Шокаровска која со својата енергија, емоција и посветеност остави длабок белег во историјата на македонскиот балет“, посочуваат од НОБ.
Ова балетско дело, поставено во два чина, ја раскажува драмата на женската душа, копнежот по страст, слобода и трагичниот судир со општествените норми.
Диригент е Едуард Амбарцумјан од Ерменија, кореографијата ја потпишува Виктор Ишчук од Украина, кој со прецизност и современ израз го доловува духот на 19 век, додека музичката подлога е составена од дела на К. Сен-Санс, М. Равел, Ж. Масне, Ф. Менделсон и Г. Ф. Хендл. Сценографијата и костимографијата се на Андреј Злобин и Гана Ипатиева од Украина, светло дизајн – Милчо Александров, а концерт-мајстор е Јане Бакевски.
Марија Кичевска Шокаровска ќе ја толкува главната улога на Ема Бовари, а во останатите улоги ќе настапат Франциско Хименез Руиз (Шарл Бовари), Балаж Лочеи (Рудолф Буланже), Дмитро Чеботар (Трговецот Лере) и Ендру Кук (Доктор Оме) заедно со солистите, балетскиот ансамбл и оркестарот на Националната опера и балет.
Билетите се пуштени во продажба, онлајн и на билетарницата на МОБ.
