Едно од раселените лица со кои разговарал Хани Махмуд, новинар на Ал Џазира во Газа, му рекло дека се чини дека Израел ја претворил Газа во лабораторија за тестирање. Не само што постојано фрла бомби врз цивили и раселени лица, туку тестира и колку далеку може да ги турне луѓето кога станува збор за глад и дехидрација, пренесува Ал Џазира Балканс.
Фактот дека во последните 62 дена не смеат да влезат храна, вода или лекови во Појасот Газа е индикација дека Газа навистина се претворила во лабораторија за тестирање на присилно гладување и дехидрација. Поради израелската блокада, 3.000 камиони со помош се заглавени на границата, на само 30 минути возење од местото каде Махмуд се наоѓа сега.
„Од моја десна страна е камп за раселени лица. Неговиот координатор добил вести од локалната кујна која им обезбедувала оброци во изминатите неколку дена. Од кујната рекоа дека од денес ќе им биде многу тешко да обезбедат какви било оброци. Многу од овие луѓе овде, ако не и сите, ќе поминат еден ден без храна“, раскажува Махмуд.
Ова е приказната низ Газа каде што многу јавни кујни се затвораат поради недостаток на помош.
Владината канцеларија за медиуми на Појасот Газа тврди дека најмалку 57 Палестинци починале од глад под целосна израелска блокада.
Во израелските напади низ Газа од зори во саботата загинаа 45 Палестинци, меѓу кои и три бебиња, соопштија медицински извори и извори од цивилната заштита.
Меѓународната осуда на израелската блокада расте, бидејќи претставници на ОН и застапниците за човекови права бараат непречен хуманитарен пристап до крајбрежната област.
Според Министерството за здравство на Газа, најмалку 52.495 Палестинци биле убиени, а 118.366 ранети во израелската војна во Газа. Канцеларијата за медиуми на владата во Газа го ажурираше бројот на жртви на повеќе од 61.700, велејќи дека илјадници луѓе кои се водат како исчезнати под урнатините се сметаат за мртви.
Се проценува дека 1.139 луѓе биле убиени, а повеќе од 200 биле заробени во Израел за време на нападите предводени од Хамас на 7 октомври 2023 година.
